Einar, Anna og safnið sem var bannað börnum

Efst á Skólavörðuholti í Reykjavík stendur sérkennileg bygging með fallegum höggmyndagarði. Þetta er Listasafn Einars Jónssonar.
En hver var Einar og hvernig listaverk skapaði hann?

Einar Jónsson fæddist árið 1874 og ákvað ungur að verða listamaður án þess að hafa nokkurn tíma séð listaverk eða komið á listasafn. Seinna kynntist hann konunni sinni, Önnu, og saman stofnuðu þau fyrsta listasafnið á Íslandi, Listasafn Einars Jónssonar.

Hér er sagt frá Einari og Önnu á lifandi og skemmtilegan hátt og fjallað um nokkur af listaverkunum sem allt þeirra líf snerist um. Af frægum höggmyndum Einars má til dæmis nefna styttuna af Ingólfi Arnarsyni á Arnarhóli og Útlaga sem sjá má við gamla kirkjugarðinn við Hringbraut í Reykjavík.

Margrét Tryggvadóttir og Linda Ólafsdóttir hafa vakið verðskuldaða athygli fyrir bækurnar sem þær hafa unnið saman og eru í senn fróðlegar og afar fallegar og henta bæði fyrir unga lesendur og eldri.